هاجمت الفنانة والإعلامية ريهام سعيد، بعض الفنانين الذين لا يقدمون التبرعات للحالات الإنسانية في برنامج "صبايا الخير".

وطالبت ريهام النجوم، بمساعدة المرضى بدلاً من تضييع وقتهم في السخرية منها حيث قالت: "أطلع وأقول من فضلكم، أنت أوفر، ريهام دي تطلع وبتشحت في التليفزيون، المسلسلات تتريق والبرامج تتريق، وكل ممثل جاب سيرتي في برنامج ولا في مسلسل، طب ما تتلحلح كدة ويبقى عندك دم وتساعد في علاج حالات البرنامج علشان إحنا ما بنهزرش، أنت بتهزر وتروح تاخذ مش عايزة أقول كام، طب ساعد يعني أنا في رمضان أنا الغائب الحاضر اسمي ظهر في جميع المسلسلات أنا سعيدة إني عملة زي الرؤساء".

وأضافت: "مفيش حد اتصل بيا وسألني عن حالات صبايا الخير دي ممكن تكون محتاجة إيه ولا قالي أنا عملت مسلسل بكذا وعايز أساعد بجزء، اتريق بس ساعد، بضايق قوي لما بحس أن الناس أصبحت مجردة من كل حاجة، عملنا حلقة عن العفاريت كل الناس افتكرت العفاريت مع أنها حلقة واحدة، وعملنا مئات الحلقات عن الحالات دي محدش افتكرهم".